Lo Jornalet.com

Es en 2012 qu’apareis lo primièr mèdia en occitan 100% numeric. I a agut de temptativas de per abans, los mèdias tradicionals avián ja creat qualques sites internet, mas es amb lo Jornalet que la recèrca d’un novèl modèl economic e editorial es ensajat, a l’ora de l’explosion dels usatges numerics.



Lo Jornalet es fondat a Barcelona pel jornalista catalan Ferriol Macip i Bonet, entrevistat dins lo reportatge prepausat aicí, e qu’a aprés a parlar l’aranés, la varianta gascona de la lenga d’òc practicada sul territòri de la region de Catalonha, en Val d’Aran.

Jornalet.com se vòl generalista : tracta de l’actualitat internacionala  coma de l’espòrt, de l’economia, de las arts o de politica, amb una atencion mai granda logicament portada sus las nòvas que concernisson la question occitana. De per sa situacion geografica, lo site es tanben fòrça atentiu a las actualitats que concernisson Catalonha, qu’es lo sol territòri ont l’occitan a un estatut de lenga oficiala.



Coma o precisa Ferriol Macip dins lo reportatge, tre lo despart Jornalet a volgut èsser un « jornal participatiu », que daissa una granda plaça als contributors exteriors. Atal, cadun pòt alimentar lo site, siá amb d’articles (un onglet « mandatz-nos una info » existís per aquò far sul portal d’acuèlh), siá per de cronicas d’opinion. En consequéncia, existís una plan granda varietat de tematicas abordadas, perque s’i retròban de tèxtes d’analisi istorica, lingüistica, filosofica o autre, segon las especialitats de cada contributor.
Amai d’aquestas participacions extèrnas, lo succès de Jornalet residís dins sa politica de dobertura als comentaris. Les lectors pòdon comentar totes los articles e aquò fa d’aqueste mèdia probablament lo sol vertadièr forum en linha dobèrt a totes los occitanofòns.



Dempuèi sa creacion, lo site a pas encara trobat de modèl economic viable e a recorregut a mantuna demanda d’ajuda alprèp de sos lectors. Una situacion qu’es pas rara : uèi en França, gaireben cap de mèdia en linha desgatja pas pro de beneficis, e la tendéncia d’aquestes darrièrs meses es al desvolopament de l’ofèrta paganta al detriment dels contenguts gratuits. Fàcia a aquelas dificultats, Jornalet a engatjat mantun partenariat amb d’autres organs de premsa occitans, en particular amb lo jornal La Setmana, abans sa desaparicion. Malgrat tot, al mes de febrièr de 2019, Ferriol Macip anóncia l’edicion del primièr numèro papièr de Jornalet, regropant una seleccion d’articles publicats long de las sèt annadas d’existéncia del mèdia.