Los dètz ans de Vistedit

La parucion del primièr numèro de La Setmana en 1995, editat per Vistedit, representa un vertadièr eveniment, saludat coma tal per una letra d’encoratjament del grand escrivan Max Roqueta publicada a la Una, convidant totes los actors e militants occitans a sosténer l’iniciativa, « se nos volèm tirar de l’ombra ont poirissèm ». Es que dempuèi lo mitan del sègle XIX i a ben agut de desenats de revistas occitanas, mas cal efectivament esperar La Setmana per aver un primièr mèdia d’informacion generalista, entièrament redigit en occitan, professional, que s’interèssa a tota l’actualitat occitana e mondiala. Dins sa linha editoriala, La Setmana a totjorn prepausat un agach occitan sus l’actualitat generala, en daissant una granda plaça als grands tèmas de la decentralizacion, de la defensa de la diversitat culturala dins lo monde, de la question de las minoritats.



Aqueste títol de premsa, qu’a doncas marcat son temps, es estat creat pel jornalista Dàvid Grosclaude e produsit per Vistedit, una Societat cooperativa e participativa (SCOP). Aquesta darrièra fa l’objècte d’aqueste reportatge a l’ocasion de sos dètz ans d’existéncia. Vistedit farà tanben paréisser dos magazines per la joinessa per fin de prepausar de supòrts de lectura e de lésers en occitan als milierats d'enfants d’ara enlà escolarizats en Calandreta e dins l’ensenhament public bilingüe : serà Papagai pels pichonets e Plumalhon pels mai grands.

Dàvid Grosclaude, entrevistat dins la vidèo, es cap-redactor de La Setmana fins a 2010, data a la quala es elegit conselhièr regional d’Aquitània. Daissa alara la redaccion del jornal a Clamenç Pech, que serà puèi remplaçat per Fanny Lartigot en 2017.

L’equipa de redaccion e de produccion de Vistedit es totjorn estada restrench, e fòrça collaborators extèrnes contribuissián cada setmana al jornal, a travèrs de cronicas o de tribunas. Amai, Vistedit a multiplicat los partenariats amb d’autres mèdias occitans, coma o fa dins lo reportatge Estève Cròs alara al micrò de la ràdio associativa Ràdio País. Pendent sos darrièrs meses d’existéncia, la societat aviá mutualizat la produccion del contengut redaccional de La Setmana amb lo site d’informacion occitana en linha, lo Jornalet.

Dins lo reportatge de 2004, la situacion economica de Vistedit - e doncas dels jornals que produtz - èra ja fragila. Aprèp mantuna annadas de dificultats, confrontada a una erosion constanta del lectorat e a una baissa de las subvencions, daissa sas activitats en 2018.