Meitat-chen, meitat-pòrc, sus las ondas de França Blu Perigòrd
Notícia
Resumit
Reportatge realizat a l'ocasion del despart de Martial Peyrouny de l'emission occitana Meitat-chen, meitat-pòrc, qu'anima pendent vint ans al costat de Joan-Pau Verdièr, e de la primièra performància de son remplaçant, Nicolas Peuch. Dins son vinhal, Martial Peyrouny explica que vòl d’ara enlà se consacrar totalament a son mestièr d'ensenhant. En estúdio, Joan-Pau Verdièr evòca los critèris qu’an permés de causir lo novèl animator. Dins los locals de França Blu Perigòrd, abans e aprèp l'enregistrament de l'emission, Nicolas Peuch testimònia de son plaser de rejónher aquesta equipa. Martial Peyrouny defend la causida de Nicolas Peuch, en solinhant son empatia. Se regaudís del novèl duò que formarà amb Joan-Pau Verdièr.
Lenga :
Data de difusion :
01 oct. 2017
Esclariment
Informacions e crèdits
- Tipe de mèdia :
- Colleccion :
- Realizator :
- Sorsa :
- Referéncia :
- 00040
Categòrias
Tèmas
Luòcs
Personalitats
Esclariment
Contèxte istoric
Par
Aqueste archiu nos permet d’assistir a l’enregistrament d’una emission clau dins lo païsatge radiofonic en occitan. Difusada a cada dimenge d’onze oras a miègjorn sus França Blu Dordonha dempuèi 1995, Meitat-chen, meitat-pòrc se debana doncas entièrament dins aquesta lenga. Amb un o mantun convidat, los animators tractan cada setmana d’actualitat culturala occitana e una atencion particulara es portada als eveniments que se debanan dins Perigòrd. Atal, cada annada, una emission especiala es realizada a l’ocasion de la Felibrejada, una fèsta de tres jorns organizada per una associacion dependenta del Felibritge dins la region.
Sus la ret ràdio de servici public, lo de las França Blau, la preséncia de l’occitan es inegala segon las regions. Se las cronicas brèvas per explicar qualques mots de vocabulari son pro frequentas, una emission entièra coma Meitat-chen, meitat-pòrc es rara e merita doncas d’èsser mesa al lum. Solide, d’autres exemples existisson : podèm citar atal Conta monde, un rendètz-vos d’una mièja orada lo dimenge a miègjorn sus França Blau Occitània amb Geraud Delbèç. Dempuèi genièr de 2019 es tanben aparegut sus França Blau Vauclusa un programa d’una ora, entièrament bilingüe, Aquí sian bèn.
Dempuèi sa creacion, Meitat-chen, meitat-pòrc es presentada per un duò d’animators. Foguèron d’en primièr l’autor-compositor Joan-Pau Verdier - tanben figura de proa de la Nòva Cançon (la Novèla cançon occitana dels ans 1970) - e lo professor de collègi e licèu, Martial Peyrouni. L’extrach qu’es prepausat aicí es estat virat al moment de la despartida d’aqueste darrièr aprèp mai de vint ans de bons e leials servicis, daissant dempuèi 2017 la plaça al musician Nicolas Peuch.
