Good Morning Occitània

Creadas dins los ans 1980, en seguida de la liberacion de las ondas decidida pel govèrnament socialista, las estacions associativas Ràdio Occitània e Ràdio País son basadas respectivament a Tolosa e a Pau. Lor tòca es de promòure la lenga e la cultura occitana gràcias a una preséncia quotidiana sus las ondas e de programas variats (jornals d’informacion, reportatges, musicas, debats, cronicas). Caduna difusa sus la benda FM dins mantun departament, Radio País se concentra sus Gasconha (Gers, Nauts Pirenèus, Lanas) e Ràdio Occitània dins la region tolosenca (Nauta Garona, Arièja, Tarn, Aude).



Sovent associadas, las doas ràdios s’escàmbian de programas cada jorn : una necessitat donada la talha reducha dels efectius. Se pòt veire dins aqueste reportatge qu’a partir de la sason 2013-2014 e pendent qualques annadas, aqueste partenariat es estat encara mai abotit amb una matinala comuna a las doas estacions : l’emission Good Morning Occitània, difusada de 7h a 10h. Realizada en dirècte dempuèi los estúdios de Pau e de Tolosa, aquesta emission aligava lo jornalisme (amb de jornals, de reportatges, d’entrevistas) e lo divertiment (musicas, cronicas umoristicas), tot aquò entièrament en occitan. Se existís pas mai uèi, pasmens, a marcat l’epòca, coma ne testimònia lo document presentat aicí.



D’autras ràdios occitanas existisson e son fòrça activas, coma Ràdio Lenga d’Òc a Narbona e Montpelhièr o Radio Nissa Pantai a Niça. Aquestas estacions practican elas tanben d’escambis de programas, que permeton a totes de difusar de contenguts nòus mantuna ora per jorn, mas tanben de far ausir los diferents dialèctes occitans. Lo modèl associatiu es uèi lo sol existent demest las ràdios que se revendican coma occitanas.