L'aniversari d'ÒC tele

Lo 20 de decembre de 2013 es estada aviada oficialament webtelevision occitana, ÒC tele. Sus son site Internet, prepausa a cada jorn qualques oradas de difusion en dirècte. Totes sos contenguts son disponibles en permanéncia.

Aqueste reportatge met en lum la realizacion de son emission vedeta, lo D’Òc show : un programa mesadièr de doas oras, difusat en dirècte, e constituit de debats d’actualitats e de scènas musicalas en live, amb fòrça convidats. Fins a 2018, cada numèro del D’Òc show èra consacrat a una tematica de societat o un fach marcant, tractat entièrament en occitan. Dins lo numèro aicí presentat, es question de l’atemptat a la redaccion de Charlie Hebdo en 2015. Mas l’emission tracta pas forçadament sonque de l’actualitat : se pòt agir tanben de debats de fons, de subjèctes de societat, etc. Per aqueste programa coma per totes los que produtz dirèctament, ÒC tele se desplaça dins las diferentas regions occitanas. Basada a Pau, cobrís particularament l’actualitat occitana de son territòri pròche, coma pel Carnaval bearnés  o lo festenal Hestiv’oc.



La cadena se vòl generalista. Prepausa d’emissions de debats, d’entretens, de reportatges, de filmes, de captacions de concèrts o encara de dessenhs animats pels enfants, doblats per l’associacion Conta’m. Dempuèi 2018 son tanben prepausadas de mini-serias de format cort (qualques minutas a pena). Citam en particular Òc-veituratge, seria umoristica de ficcion, o encara Òc Kay, que se dona doas minutas per explicar d’un biais umoristic, leugièra e descalada una expression o un aspècte de l’istòria de la lenga occitana. ÒC tele permet als locutors occitans d’aver accès en permanéncia a de programas variats dins lor lenga, destinats a totes los publics e a totes los atges, causa qu’existissiá pas de per abans en defòra de las qualques emissions de França 3.



ÒC tele es estada pensada sul modèl de Brezhoweb, webtelevision producha per la meteissa estructura, LBGroupe. La creacion d’ÒC tele es estada possibla gràcias al sosten de mantuna collectivitat locala, en particular regionalas e departamentalas. D’alhors, es pas un azard se lo tot primièr numèro de l’emission D’Òc Show, es estat realizat dins l’encencha del conselh regional d'Aquitània a Bordèu.