Los Bòscs Escharvalhats

En 1983 apareis una emission en occitan sus FR3 Auvèrnhe, Païs Viu. Es un extrach del tot primièr numèro qu’es prepausat dins aqueste document. Aquel magazine a pas agut una existéncia gaire longa e malurosament es pas estat remplaçat dempuèi alara, aquò fa d’Auvèrnhe un dels rares territòris occitans sens emission televisuala dins sa lenga (demest aqueles comptam tanben Lemosin e los departaments de Droma e d'Ardecha).

Lo presentator de Païs Viu, Philippe Marmy, a contunhat apuèi sa carrièra de jornalista a França 3, fins als annadas 2010. Es totjorn activament implicat dins la defensa de la lenga d’òc, perque organiza de « cafès occitans » a Clarmont, que son de seradas d’escambis per practicar aquesta lenga.



Lo format de l’emission, precisat per l’animator tre lo començament de l'extrach, diferís de lo dels autres programas en lenga d’òc. De faiçon fòrça comuna, sa difusion es setmanièra (« normalament lo dijòus, de còps lo divendres » explica Philippe Marmy), mas es previst que Païs Viu difusa pas de reportatges realizats en Auvèrnhe qu’un còp sus dos. La segonda setmana, son doncas de reportatges venguts de las divèrsas regions occitanas que devon èsser recuperats, lo presentator insistís sus la proximitat entre totes los dialèctes occitans. Enfin, « quand serà possible », es envisatjat d’aver tanben de convidats sul platèu. Aquestes elements indican d’en primièr qu’i aviá sonque un budgèt limitat sus FR3 Auvèrnhe per la lenga d’òc, mas tanben que Païs Viu se revendicava plenament coma un programa occitan.

Lo tot primièr reportatge tracta dels degalhs provocats per una tempèsta dins los bòsques d’Auvèrnhe, confirmant atal la volontat - ela tanben afichada, de prepausar una vertadièra emission d’actualitat.