Parlar Occitan

Demest totes los programas en occitan creats a la debuta dels ans 1980, aquí n’i a un que se distinguís : sa volontat es pas ni d’informar en lenga d’òc, ni de far descobrir aquesta cultura. Es tot simplament un cors d’occitan qu’es prepausat cada setmana sus l’antena de FR3 Aquitània, en partenariat d’alhors amb l’Educacion nacionala.



D’un biais gaireben evident, aquesta emission s’apèla doncas Parlar Occitan, e lo cors es assegurat per tres « professors » que parlan cadun un dels dialèctes de la region. I a Marcèu Esquieu, lo Lengadocian, escrivan e co-fondator de l’Escòla occitana d’estiu ; Peireta Bòrdanava, la Gascona, militanta que s’implicarà en particular a Ràdio País en Bearn ; e enfin Joan Rós, lo Lemosin, que foguèt en particular lo president de la seccion locala de l’Institut d’estudis occitans.



Totes tres insistisson a mai d’un còp sus l’unitat de la lenga malgrat les diferéncias de prononciacion que fan ausir. Aquesta dificultat de las variantas dialectalas se retròba per totas las emissions en lenga d’òc, perque lo decopatge de las regions correspond pas a lo dels parlars. Cal notar que, pertot, se pren cura de representar totas las varietats d’occitan, las diferéncias de dialèctes coma las de sosdialèctes (atal en Provença per exemple, de subjèctes son menats en provençal rodanenc, en niçard, etc.)



Amb d’exemples de frasas e de conjugasons donats successivament dins las tres variantas d’Aquitània, la tòca d’aquesta emission es finalament tanben de provar l’unitat de la lenga occitana dins una region ont las identitats localas pòdon èsser plan marcadas, coma es lo cas en particular en Bearn o dins Perigòrd.