Testar sas conneissenças del provençal

Aquesta vidèo es un extrach del tot primièr numèro del magazine Vaquí, difusat lo 7 d’abril de 1984. Vaquí es una emission en occitan, dins sa varianta provençala, difusada cada dimenge sus las antenas de França 3 Provença-Aups e França 3 Còsta d’Azur. Se uèi aqueste programa dura 26 minutas, a son aviada despassava pas un quart d’ora (e plan sovent durait un pauc mens).



Es aparegut a la seguida d’autres magazines en lenga d’òc, coma Viure al País realizat a Tolosa a partir de la debuta dels ans 1980. Sèm aquí dins una decennia ont l’occitan es de mai en mai present dins los mèdias e en particular los de l’audiovisual (ràdios e televisions), mentre que sa plaça siá demorada fòrça febla fins a uèi. Magazine essencialament cultural, Vaquí s’adapta a las diferentas variantas de la lenga, segon los endreches ont l’emission es de còps enregistrada (niçard, provençal maritim, provençal rodanenc, etc.).

Mantun animator se son succedits per aqueste magazine, coma Jean-Pierre Belmon o Frederic Soulié, e d’intervenents exteriors a l’entrepresa son tanben estats meses a contribucion, coma Sylvan Chabaud, cantaire e escrivan occitan, qu’a tanben presentat Vaquí.



Se pòt veire dins aqueste extrach de la tota primièra emission la lexicografa Josiana Ubaud, mesa a contribucion per una experiéncia menada dins lo centre vila de Marselha : un quiz per far prene consciéncia als passants de l’origina provençala de mots qu’emplegan al quotidian.



Amai del magazine dominical, l’equipa de Vaquí prepausa cada dissabte un brèu jornal d’actualitat en occitan, Vaquí Mag, que dura cinc minutas. Es difusat a la seguida del jornal de miègjorn, un bon orari en tèrmes d’audimat, e doncas de visibilitat per la lenga d’òc.