Viure Al País : L'Erba d'agram (extrach)

Viure al País, magazine tot en occitan difusat cada dimenge matin sus França 3 Occitània, es estat creat en 1981. Mai precisament lo 31 d’octobre d‘aquela annada, un mes aprèp qu’una primièra emission, Per Jòia Recomençar, es estada testada. Es un extrach d’aquesta primièra que se pòt veire aicí. Aquò fa doncas de « VAP » lo mai ancian programa en occitan encara a l’antena uèi. Per contra, en gaireben 40 ans, sa forme a evidentament evoluat. Foguèt atal inicialament programat un dissabte. Sa durada a variat tanben, en tendent en general - e malurosament - a demesir.



Atal lo primièr numèro, intitulat L’èrba d’agram, qu’un extrach n’es presentat aicí, durava un pauc mai d’una mièja ora. Lo format es apuèi passat a 40 minutas, mas es tornat a 26 minutas a la fin dels ans 1990. En contrapartida foguèt instaurat lo jornal televisat en occitan que, el, es difusat cada dissabte de ser a 19h15 e dura 7 minutas. Coma s’inscriu dins lo periòde d’informacion del 19/20, juste aprèp las actualitats regionalas, benefícia d’una plan melhora visibilitat e d’una audiéncia incomparabla amb la d’un dimenge de matin. Enfin, per tornar parlar de Viure al País, en 2018 una novèla modificacion foguèt aportada : mentre qu’alternava entre difusion en lenga occitana e difusion en lenga catalana, los dos idiòmas son ara presents a cada setmana, mas sus una durada mai corta : 9 minutas en catalan e 17 en occitan.

Se comparam l’extrach prepausat aicí, datant de 1981, amb un magazine actual, l’autre diferéncia que sauta als uèlhs es evidentament lo contengut de l’emission. Uèi, los reportatges s’encadenan, mentre qu’a l’epòca, lo programa èra bastit al biais d’un documentari, sens rompedura entre las sequéncias que son totas incarnadas pel presentator, Maurici Andrieu. Un presentator que trantalha pas a se desguisar coma se pòt veire dins nòstra vidèo, ont arbòra un vestit d’institutor de la Tresena Republica per donar la replica al comedian Claude Alranq.



Maurici Andrieu, lo fondator de Viure al País, es demorat en carga d’aquesta emission fins a sa retirada en 1998. Mètge anestesista qu’aviá quitat aquela profession per passion pel teatre e la lenga d’òc, aviá integrat l’ORTF (l’Ofici de radiodifusion-television francesa) dins los ans 1970. Vertadièr precursor de la television en occitan, aviá ja agut la carga de programas quz presentavan aquesta cultura avant de lançar Viure al País.