Dàvid Grosclaude presenta l'Ofici Public de la Lenga Occitana

La creacion d’un tal ofici, qu’assòcia dins una meteissa estructura de proteccion de la lenga regionala l’Estat e las collectivitats territorialas, èra estada obtenguda dempuèi pro longtemps pel breton e pel basc. La question èra sul pic un pauc mai complicada per l’occitan, dins la mesura que mantuna region èran concernidas.

Las eleccions regionalas de 2010 pòrtan dins totas les regions administrativas de l’espaci occitan francés de majoritats politicas a pauc prèp convergentas a l’entorn d’acòrds dels partits d’esquèrra, ecologistas e regionalistas. Lo Partit occitan reüssís la proesa d’aver un elegit, sovent delegat a la lenga occitana, dins quatre regions.

Son aqueles elegits occitanistas d’Aquitània e Miègjorn-Pirenèus, Dàvid Grosclaude e Guilhèm Latruvèrsa, e amb eles los dos executius regionals que van portar lo projècte de creacion d’un ofici public de la lenga occitana.

L’Estat se mòstra mens entosiasta, en publicant pas lo decret que crèa l’ofici malgrat las deliberacion dels conselhs regionals. Aqueste blocatge aviá menat Dàvid Grosclaude a entamenar una grèva de la fam dins l’Ostal de Region de Bordèu. L’Estat a alara acabat per acceptar de jogar lo jòc e l’OPLO a pogut èsser creat. Los mejans financièrs aportats per L’Estat, quant a eles, foguèron pas a la nautor de las esperanças e luènh de los que ne son dotats los oficis pel basc e lo breton.



La refòrma territoriala de 2016 modifica la dona : la Novèla-Aquitània inclutz d’ara enlà Lemosin e Peitau, dont la partida orientala de Charanta es occitanofòna. Parallèlament, Lengadòc e Rosselhon rejonh Miègjorn-Pirenèus dins lo quadre de la novèla « Occitània ». L’Ofici public de la lenga occitana a doncas d’ara enlà una susfàcia d’intervencion de mai de 20 departaments occitanofòns, mas Provença, Auvèrnhe e la partida occitana de la valada de Ròse e dels Alps demòran en defòra de la cooperacion politica integrada al dintre de l’Ofici.

Coma a conegut qualques setmanas solament aprèp sa creacion la mesa en aplicacion de la refòrma territoriala (lei portant sus la novèla organizacion territoriala de la Republica, o NOTRe) e lo remplaçament de sos elegits, gaire dotat financièrament per l’Estat, l’OPLO bastís pauc a pauc son ròtle e son utilitat dins un contèxte general de desvolopament de l’accion publica en favor de la pluralitat lingüistica en França e en Euròpa.