Nux Vomica al festenal Histoire d'Occitanie

Aquesta vidèo es extracha d’un reportatge sul grand concèrt de promocion de la diversitat occitana, organizat a Castèlnòu de Les prèp de Montpelhièr en 1995 per la Region Lengadòc e Rosselhon. Aquesta èra estat una de las primièras a crear una mission a las lengas regionalas al mitan dels ans 1980, que lancèt mantuna manifestacion d’envergadura, coma aqueste festenal Istòrias d’Occitània, projècte de « Woodstock occitan » confiat al jornalista especialista de las musicas e culturas del monde Frank Tenaille. Pendent mantuna ora se succedisson a l’entorn de l’escrivan Max Roqueta e del cantaire Claudi Martí un centenat d’artistas que venon de tot l’espaci occitan.
A l’ocasion d’aqueste grand concèrt, lo passatge del grop niçard Nux Vomica crèa l’eveniment. Sèm en 1995 e, per fin de contextualizar, es necessari de far un pichon retorn qualques annadas en arrièr. D’en primièr collectiu artistic, Nux Vomica nais al dintre d’un hangar abandonat del quartièr Sant Ròc, a Niça. Luòc dedicat a l’expression totala e dobèrt a totes, ven lo punt neuralgic d’una vida artistica abondanta a la fin dels ans 1980. Lo rencontre amb l’artista Ben es important per l’evolucion del collectiu, e donarà vida a de projèctes carnavalesques coma lo carri de la Ratapinhata. En perlongament, un autre projècte nais dins l’hangar : la creacion del Carnaval Independent de Sant Ròc. Es l’ocasion de reïnvestir, per aquesta fèsta populara, un quartièr tròp longtemps doblidat pels poders publics e los decisionaris locals de l’epòca. Es tanben un autre biais de viure e festejar lo carnaval, luènh de la maquina toristica e superficiala que prepausa la vila de Niça amb son carnaval dich « oficial ». Mas per far la fèsta, cal aver de musica : es per aquò que lo collectiu artistic evolua plan viste en projècte musical. Lo grop va atal ajaire d’un primièr album de 2 títols, intitulat Libera Jacquou, que denóncia d’un biais desviat e subversiu lo sistèma politic impausat alara per l’ancian cònsol de la vila de Niça, Jacques Médecin qui, al moment de la sortida del disc, es en fugida en Uruguai. En aquesta quita annada 1995 sortirà tanben lo primièr album del grop, Nissa Independenta, un projècte de 14 títols que ne citarem, entre autres, las excellentas cançons St Roch quartier, Ragabalat, Capitan Nissa o ben encara Catarina Segurana. Es aquesta darrièra que se tròba dins l’extrach del concèrt de Castèlnòu de Les.



Sus scèna, reconeissèm una de las totas primièras formacions de Nux Vomica, amb la preséncia de Jean-Louis Ruf (tambornet), Louis Pastorelli e Vincent Calassi (cantaires), Michèle e Tièrry Lagalla (animators de scèna e cantaires). Louis Pastorelli se remembra que aquestes darrièrs menavan una teatralitat pròpria al Carnaval, e que lo grop se trobava a aquesta epòca dins una recèrca gestuala e comportamentala sus scèna, en referéncia dirècta a aqueste imaginari carnavalesc.



Quant a la cançon Catarina Segurana, es estada escricha coma un omenatge a la femna niçarda. Personatge legendari del sègle XVI, Catarina Segurana, pichona bugadièra, auriá participat activament a la resisténcia fàcia a l’envasidor francés e otoman qu’ensajava alara de s’emparar de Niça. Fàcia a la temptativa de recuperacion politica d’aqueste simbòl, Nux Vomica rapèla las valors qu’incarna l'eroïna niçarda sens ne doblidar sas originas popularas.

Per conclure, l’extrach aicí presentat testimònia d’una etapa dins l’evolucion del grop Nux Vomica, e d’un estat d’esperit ligat a aquesta temporalitat. Uèi lo grop es encara fòrça actiu : 2019 marca en particular la sortida de son seten album, Manda ! Nissa mediteranèa, e tanben d’un libre que retraça l’istòria del grop, Li aventuras de Nux Vomica.