Convencion sus l'ensenhament de la Lenga occitana

Es un pas important per l’ensenhament de l’occitan qu’es franquit lo 26 de genièr de 2017 amb la signatura d’una convencion-quadre associant l’Estat a travèrs lo ministèri de l’Educacion nacionala , las regions Novèla Aquitània e Occitània-Pirenèus-Mediterranèa, e l’Ofici public de la lenga occitana (OPLO). Aquel jorn, la ministra Najat Vallaud-Belkacem a fach lo desplaçament a Tolosa e visitat de classas bilingüas abans la ceremònia oficiala pendent la quala la convencion es signada.

Dempuèi la lei d’orientacion per l’escòla de 2005, l’article 312.10 del Còde de l’educacion prevei qu’ « un ensenhament de lengas e culturas regionalas pòt èsser dispensat long de l’escolaritat per via de convencion entre l’Estat e las collectivitats territorialas ont aquelas lengas son en usatge. » Dins los faches, aquelas convencions son pas de bon metre en plaça. Se trucan regularament a las oposicions politicas entre collectivitats localas e Estat quand los unes e los autres son pas del meteis bòrd, o encara a de dificultats a s’entendre suls engatjaments de cadun en tèrmes de budgèt e de desvolopament de l’ensenhament.



Mantuna convencion, mai o mens constrenhentas, son estadas signadas dins los ans 2000-2010 sens donar vertadièrament satisfaccion. La convencion qu’es signada en genièr de 2017 es quant a ela mai ambiciosa : formaliza las contribucions dels signataris e es sustot fòrça volontarista en tèrmes de desvolopament de l’ensenhament. Prevei d’un autre latz de declinasons academicas amb d’objectius chifrats. Coma lo senhala Estève Cròs, director de l’OPLO, dins lo reportatge, la preséncia demest los signataris de l’Ofici public, qu’assòcia l’Estat e las regions Novèla Aquitània e Occitània, permet d’aver enfin un luòc privilegiat de concertacion entre collectivitats e Estat central sus la question de l’ensenhament de l’occitan.

Pasmens, aquesta convencion a sos limits. D’en primièr, coma o rapèla Maria Joana Verny, secretària de la Federacion dels ensenhants de lenga e cultura d’òc (FELCO), perque sonque una partida de l’espaci occitan es concernida. Las acadèmias de las regions Auvèrnhe-Ròse-Aups e Provença-Aups-Còsta d’Azur, que son pas membras de l’OPLO, son pas, de fach, engatjadas dins aqueste acòrd. Puèi perque las declinasons academicas tardan a se metre en plaça. Dos ans pus tard, en 2019, mentre que la convencion es prevista per una durada de cinc ans, son pas encara signadas.

Se lo progrès es indenegable, pasmens, deu pas èsser subrestimat.  Al moment de la signatura d’aquesta convencion, la ministra anóncia tanben la creacion d’una agregacion de lengas de França, autre progrès tot autant relatiu donat qu’i a pas gaire de pòstes dobèrts a aquel concors (un sol per l’occitan la primièra annada).

Simbolicament importanta perque marca l’interès de l’Estat e de las collectivitats per l’ensenhament de la lenga d’òc, l’utilitat practica de la convencion-quadre sus l’ensenhament de l’occitan demòra doncas dins los faches encara de demostrar, particularament dins lo cas qu’una alternància politica menariá los novèls elegits o governants a se sentir pas tenguts pels engatjaments de lors predecessors.