Manifestacion per una reconeissença de l'occitan dins l'audiovisual

La preséncia de l’occitan e de las lengas regionalas a la television francesa es lo resultat d'un long combat e demòra uèi encara un objècte de revendicacion. Organizada a l'apèl de nòu collectius, la manifestacion de Marselha de 1982 se debana un an aprèp l’eleccion de François Mitterrand a la presidéncia de la Republica. Se la creacion de França Regions 3 (FR3) en 1975 aviá ja constituit una dobertura, es amb son eleccion qu'es obtenguda la preséncia de l'occitan sus las ondas hertzianas nacionalas. Pasmens cal esperar lo començament dels ans 1980 per veire aparéisser las primièras emissions en lengas regionalas dins l’audiovisual public : d’emissions coma Vaqui en Provença o Viure al País prepausan d’ara enlà un temps d’antena en occitan un còp per setmana.



La fin del monopòli d’Estat sus la difusion audiovisuala en 1982 permet tanben l’emergéncia de fòrça ràdios localas qu’emeton, per tot o partida, en occitan. Es pas de bon saber amb precision quant d’aquelas ràdios associativas « occitanizadas » son alara creadas mas se pòt parlar d’un certan borbolh radiofonic en lenga d’òc. Se bravament d’aquelas ràdios, fòrça localizadas, daissan rapidament d’emetre, certanas se perennisan coma Ràdio Pais dins Bearn o Ràdio Occitània dins la region de Tolosa.



Malgrat tot, en 1982, los militants considèran qu’aquesta pòrta dobèrta es pas sufisenta. Aquesta volontat fòrta de far entrar l’occitan dins lo pichon ecran es pas anecdotica. En efièch, la television es, dins aquesta segonda meitat del sègle XX, lo mèdia de massa per excelléncia e jòga un ròtle màger dins la difusion e la prescripcion de las nòrmas lingüisticas. Es per aquesta rason qu'en aquesta jornada de 1982 a Marselha, tot en saludant las avançadas obtengudas, lo cortègi e sos representants reclaman mai qu’una emission setmanièra : una preséncia quotidiana.

En 2018, de manifestacions similaras se debanan a Tolosa e Carcassona per la presa en compte de l'occitan dins l'audiovisual public ; 40 ans aprèp la manifestacion de Marselha, las revendicacions demòran doncas las meteissas.