Lo festenal Total Festum

En 2004 una novèla majoritat regionala en Lengadòc e Rosselhon (PS, PC, Les Verts) jos la presidéncia de Georges Frêche s’èra engatjat per una politica mai volontarista e partenariala en matèria de desvolopament de las lengas occitana e catalana. En 2005, dins un contèxte ont la primièra manifestacion Anem Òc amassa a Carcassona 10 000 manifestants en favor de l’occitan, la Region lança una granda concertacion amb los actors associatius e professionals, la Consulta.

Surgís alara l’idèa de crear una fèsta annadièra que permetriá a la creacion e a tot çò que fa l’occitanitat contemporanèa d’investir l’espaci public e d’anar al rencontre d’un public larg.

Total festum, que se poiriá traduire pel concèpte de « fèsta totala », coneis sa primièra edicion sus la plaça de la Comèdia al còr de Montpelhièr tre la davalada de 2006. Coma l’evòca Eric Andrieu, alara elegit regional en carga de l’occitan, Total festum es alarguit a tota la region Lengadòc e Rosselhon en 2007, coma o serà als tretze departaments de la novèla region Occitània a sa creacion en 2016.

L’eveniment s’installa a l’entorn del mes de junh e de rituals festius tradicionals dins la region dels fuòcs de la Sant Joan. Sostitolat « fièrs de nòstras culturas », Total Festum prepausa cada annada mantun centenat d’eveniments festius, concèrts, teatre, conferéncias, rencontres a l’entorn de la celebracion d’un art de viure a l’occitana e a la catalana per mai de 100 000 participants.

Al costat dels grands festenals « de las culturas occitanas » que se’n parla d’ara enlà al plural coma l’Estivada a Rodés o Hestiv’Oc a Pau, Total Festum es emblematic del reviscòl d’una accion en favor de l’occitan basada sul rencontre, la transmission e l’afirmacion festiva, dobèrta e descomplexada d’una identitat resolgudament jove e creativa. Sagèla tanben la montada en poténcia de l’accion publica de las collectivitats territorialas que ressentisson e espleitan lo potencial inclusiu e marketing de la valorizacion de la lenga e de la cultura regionala alprèp d’un public larg.

Nascut de la concertacion entre collectivitat regionala e actors de l’occitan, Total Festum demòra uèi un dispositiu cogerit entre la Region qu’apòrta lo finançament e los objectius en matèria d’accion publica, e los portaires de projèctes, associacions e collectivitats localas, que bastisson lor Total Festum a l’escala de lor territòri.