Mediatèca

A l’ocasion de la signatura de la convencion-quadre pel desvolopament de l'ensenhament de l'occitan, Najat Vallaud-Belkacem, ministra de l'Educacion nacionala, de l'ensenhament superior e de la recèrca, es anada a l’escòla bilingüa Pèire Godolin de Tolosa. D’escambis en occitan se son tenguts entre de CP de l’escòla e la ministra, puèi amb de professors e de parents d’escolans. Per l’Ofici Public de la Lenga Occitana (OPLO), aquesta signatura es una capitada. Estève Cròs, son director, explica lo ròtle de la convencion : èsser una aisina de concertacion e d’escambi amb l’Estat per fin de menar d’accions concrètas e mutualizadas entre las acadèmias de la Region Occitània. Maria-Joana Verny, de la Federacion dels ensenhants de lenga e de cultura d’òc (FELCO), deplòra que l’acòrd incluïsca pas d’autras regions de l’airal cultural occitan, talas coma Auvèrnha e Provença.

Los escolans e ancians escolans del collègi montpelhierenc, Leon Còrdas, presentan lor escòla. Los corses son assegurats en occitan e los escambis entre escolans e professors i son facilitats. Matilda, d’ara enlà liceana, explica que l'occitan a pogut èsser un factor d'integracion dins sas experiéncias escolaras e professionalas. Eric Dars, professor d'istòria-geografia, dona d’exemples d'ancians escolans qu’an pogut accedir a l'emplec gràcias a lors coneissenças de la lenga regionala. Leon Còrdas, es tanben un internat per un cinquantenat d'escolans. Maximilian ne fa partida e testimònia del bon ambient que i regna. A Pau, en 6ena, li agrada tanben son collègi.

Lo collòqui de l'Associacion internacionala d’estudis occitans (AIEO) a acampat, a Bordèus, mai de 200 cercaires del monde entièr. Georg Kremnitz (Àustria), president de l’AIEO, Peter Cichon (Àustria),Thomas Field (Estats Units)e Naoko Sano (Japon) soslinhan la riquesa, coma objècte de recèrca, de l'occitan , que pòt pas èsser relegat a un estatut de dialècte local.

Una serada de sosten a las Calandretas d'Auvèrnha es estada organizada per sosténer e far conéisser aquelas escòlas. Acampa de personalitats del monde associatiu, parents d'escolans e musicians tradicionals. Joan Rós, autor del metòde Assimil d’occitan auvernhat e Maguy Deygas, presidenta de l'associacion regionala Calandretas del Vernhat, n'explica las finalitats. Seguisson apuèi d’exemples contrastats de Calandretas : al Puei de Velai e a Orlhac.

L'ensenhament public bilingüe francés-occitan se desvolopa a Albi, de la mairala al collègi. Monica Delmàs e Anhès Amalric, institutritz en mairala e en primària a l'escòla Rochegude, explican lo foncionament d’un ensenhament a paritat orària. Bernat Lescalier, professor, expausa l'emplec del temps e lo programa dedicat a las oras en occitan al collègi Bellevue.

En 1991, lo Diploma d'estudis universitaris generals (DEUG) d'occitan nais dins los locals de las universitats de Pau e de Bordèu. Aquitània es pilòta dins aqueste projècte experimental, explica Joan Salas-L’ostau, professor d'occitan a Pau. Bernat Arrós, el tanben professor, descriu lo DEUG d'occitan que se parteja a 50% amb lo DEUG de Letras Modèrnas.

De caminaires, institutors itinerants occitans, son estats nomenats en Bearn e en Bigòrra. Alan Cassenhau e Loís Saüt ne descrivon lo percors, de sa formacion fins al debanament d'una jornada-tipe. Los caminaires an lo doble ròtle d'ensenhant e de conselhièr, per fin d'ajudar los institutors que desiran ensenhar la lenga occitana dins lor classa. Solinhan qu’aqueste ròtle es pas de bon téner dins lo temps que lor es impartit.

A l'ocasion de la sortida d'un libre escolar en gascon, l'institutritz Josette Belloc descriu l'ensenhament de las lengas dins una Calandreta. Lo president de l'associacion Calandreta, Jean-Pierre Lalanne-Cassou, apela a la reconeissença de l'ensenhament en occitan per l’Educacion nacionala amb la creacion de doas filièras, las escòlas bilingüas publicas e las escòlas immersivas associativas.

D’estagis de provençal se debanan a l'annèxe de l'Escòla normala de Marselha pendent 6 setmanas. Aquesta proposicion atrai fòrça candidats. Henri Canetto, professor de provençal, explica que l'aprentissatge de la lenga se fa aisidament pels institutors locals perque lor es familiara. Atal, d’estagiaris s'exercisson a la lectura. Per Lucien Gaillard, conselhièr pedagogic, lo provençal es una lenga rica. Planh que siá pas ensenhada mai largament als enfants de Provença.

L'Universitat occitana d'estiu, dobèrta a totes, organiza sa segonda edicion. Robèrt Lafont, director dels estudis de l'Institut d’Estudis occitans e organizator, ne detalha l’ambicion : afavorir los escambis sus la cultura occitana e ne sosténer la creacion contemporanèa. Marçau Esquieu explica lo succès del projècte per la bona volontat de las institucions, e la fòrta sensibilizacion de la populacion.

De joves del centre cultural de la vila d'Aurenja son anats a Civèrgas per seguir un estagi consacrat a la lenga e la cultura occitanas. Lo vilatge de dètz abitants, situat sus un naut platèu, es lo decòr perfièch per una immersion totala. A travèrs d'animacions propausadas per Pèire Pessamessa e José Ferrandi, an descobèrt en particular lo quotidian dels abitants d'un còp èra.