Mediatèca

Vidèos

  • 01 oct. 2017

    Ref. 00040

    Lenga : OC

    Meitat-chen, meitat-pòrc, sus las ondas de França Blu Perigòrd

    Reportatge realizat a l'ocasion del despart de Martial Peyrouny de l'emission occitana Meitat-chen, meitat-pòrc, qu'anima pendent vint ans al costat de Joan-Pau Verdièr, e de la primièra performància de son remplaçant, Nicolas Peuch. Dins son vinhal, Martial Peyrouny explica que vòl d’ara enlà se consacrar totalament a son mestièr d'ensenhant. En estúdio, Joan-Pau Verdièr evòca los critèris qu’an permés de causir lo novèl animator. Dins los locals de França Blu Perigòrd, abans e aprèp l'enregistrament de l'emission, Nicolas Peuch testimònia de son plaser de rejónher aquesta equipa. Martial Peyrouny defend la causida de Nicolas Peuch, en solinhant son empatia. Se regaudís del novèl duò que formarà amb Joan-Pau Verdièr.

  • 16 julh. 2017

    Ref. 00091

    Lenga : OC

    Lo trio femenin Cocanha

    Lo grop femenin Cocanha es compausat de Caroline Dufau, de Lila Fraysse e, darrièra arribada, de Maud Herrera que n'es la primièra aparicion televisuala. Aprèp una presentacion de lor virada estivala, las cantairas interprètan lo tròç Dempuèi Auriac dins lo jardin Raimon VI de Tolosa, a la broa de Garona.

  • 11 junh 2017

    Ref. 00070

    Lenga : OC

    La cantèra

    La cantèra es un moment de convivéncia vocala, collectiva e polifonica. L’ensemble de polifonia Balaguèra a enregistrat atal son novèl album, Frequéncia cantèra, dins l’acostica naturala d’un cafè. Los sòcis evòcan lo caractèr convivial e federator de la cantèra accessibla a totes, e qu’assegura la transmission de la lenga e de la cultura alprèp de las joves generacions.

  • 04 feb. 2017

    Ref. 00026

    Lenga : OC

    Pecot, Privat e Bardou, meses a l'onor pel Troubaour Art Ensemble

    Per una creacion musicala e dançada que lo fial conductor n’es la dissidéncia, los poètas Franc Bardou, Jacques Privat e Rotland Pecot intervenon a la Mediatèca del Grand Narbona. Gérard Zuchetto, musician-cercaire, los compara a d'autras figuras màgers de la literatura occitana. Franc Bardou desira menar un public pas assabentat a descobrir de poesias e d’autors gaire coneguts. Rotland Pecot evòca l'escritura poetica.

  • 28 gen. 2017

    Ref. 00010

    Lenga : OC

    Convencion sus l'ensenhament de la Lenga occitana

    A l’ocasion de la signatura de la convencion-quadre pel desvolopament de l'ensenhament de l'occitan, Najat Vallaud-Belkacem, ministra de l'Educacion nacionala, de l'ensenhament superior e de la recèrca, es anada a l’escòla bilingüa Pèire Godolin de Tolosa. D’escambis en occitan se son tenguts entre de CP de l’escòla e la ministra, puèi amb de professors e de parents d’escolans. Per l’Ofici Public de la Lenga Occitana (OPLO), aquesta signatura es una capitada. Estève Cròs, son director, explica lo ròtle de la convencion : èsser una aisina de concertacion e d’escambi amb l’Estat per fin de menar d’accions concrètas e mutualizadas entre las acadèmias de la Region Occitània. Maria-Joana Verny, de la Federacion dels ensenhants de lenga e de cultura d’òc (FELCO), deplòra que l’acòrd incluïsca pas d’autras regions de l’airal cultural occitan, talas coma Auvèrnha e Provença.

  • 16 abr. 2016

    Ref. 00090

    Lenga : FR

    Super Parquet al Printemps de Bourges

    Seleccionats per Les Inouïs, la scèna descobèrta del festenal Le Printemps de Bourges, los musicians auvernhats de Super Parquet an conquistat un public de professionals e d'amators. Propausan un repertòri que mescla electrò e musicas tradicionalas. Julien Barathay, a las maquinas e bordons electrics, e Louis Jacques, al cant e a la cabreta electrica, dònan un retorn positiu d’aquesta experiéncia

  • 12 nov. 2015

    Ref. 00048

    Lenga : FR

    Dàvid Grosclaude presenta l'Ofici Public de la Lenga Occitana

    L'Ofici Public de la Lenga Occitana (OPLO) ven oficialament d'èsser creat. Son president, Dàvid Grosclaude, tòrna sul ròtle d’aquesta estructura pilotada per tres partenaris, l'Estat e las regions Aquitània e Miègjorn-Pirenèus. Aisina publica en favor del desvolopament de la lenga occitana, l'OPLO a per tòca la mesa en òbra d'accions concrètas per la transmission de la lenga occitana dins l'ensenhament, los mèdias e la vida publica. Segon Dàvid Grosclaude l'eveniment es istoric, perque las collectivitats se son entenducas per que lo patrimòni lingüistic siá entretengut e considerat coma una aisina per bastir l'avenidor.

  • 12 abr. 2015

    Ref. 00096

    Lenga : OC

    L'aniversari d'ÒC tele

    La web television en occitan, ÒC tele, festeja sa primièra annada d’existéncia. Stéphane Valentin, cargat de produccion, testimònia de l'atrach de la cadena que recep una granda varietat de proposicions de programas. L'animator Silvan Carrèra presenta D’Òc show, lo talk-show qu’anima, emblematic de la cadena e fondat sus un concèpte d'itinerància. Stéphane Valentin evòca las retombadas positivas d’aquesta emission per la valorizacion de l'occitan e de sos actors. Segon lo musician Nicolas Peuch, ÒC tele es un mèdia important per la promocion artistica. Silvan Carrèra ne solinha quant a el la portada politica :  la cadena dona als locutors de la lenga occitana e als portaires de la cultura d’òc la possibilitat de s’exprimir.

  • 07 dec. 2014

    Ref. 00015

    Lenga : OC

    Mistral e lo Felibritge

    Cent ans aprèp sa desaparicion, l’òbra de Mistral demòra de descobrir, a travèrs, en particular, d’una partida de sa correspondéncia conservada al CIRDÒC. Aurelian Bertrand, archivista, descriu un archiu retrobat. Ives Roqueta dona sa vision del poèta. Benjamin Assié, director del CIRDÒC e comissari de l’exposicion Mistral e Euròpa, evòca sa renommada.

  • 21 set. 2013

    Ref. 00039

    Lenga : OC

    Good Morning Occitània

    Ràdio Occitània, basada a Tolosa, e Ràdio País, a Puei de Lescar, prepausan cada matin una emission comuna, Good Morning Occitania, e se partejan respectivament los programas musicals e l'actualitat. Lo jornalista tolosenc Guillaume Gratiolet evòca lo caractèr non-sectari d’aquesta emission en lenga d'òc, que prepausa a l’encòp de programas de musica internacionala e occitana. Emilie Laulhé, jornalista de Ràdio País, explica la dobertura de la ràdio a de subjèctes d'informacion generala. Los subjèctes pròpris a l'occitan son desvolopats aprèp la matinala. Alex Chiavassa, tecnician de Ràdio Occitània, presenta la Federacion Interregionala de Mèdias Occitans (FIMOC) e sas orientacions. La federacion vòl desvolopar la mutualizacion de mèdias occitans.

  • 17 feb. 2013

    Ref. 00075

    Lenga : OC

    Jean-Claude Coudouy, lo charcutièr umorista

    Jean Claude Coudouy es maselièr charcutièr a Laruntz dins los Pirenèus Atlantics. Contaire e cançonièr, es l'autor, en particular, del conte scenic Lo hilh de puta. Filmat en çò seu, evòca la primièra performància scenica d’aquel conte a l’ocasion del Festenal de la Cançon bearnesa de Siròs, e descriu las caracteristicas de l'umor gascon. D’extraches del Hilh de puta pontuan l'entreten.

  • 22 set. 2012

    Ref. 00068

    Lenga : OC

    Lo jòc del tambornet

    Reportatge consacrat a la primièra Copa del monde de jòc del tambornet que se debana a Ginhac, dins Erau. Dins un archiu de 1965, Max Roqueta, fondator de la Federacion francesa de jòc de bala al tambornet, evòca l'evolucion del jòc cap a una practica esportiva. Puèi Bernard Barral, president de la Federacion, testimònia de l'estrambòrd a l’entorn d’aqueste espòrt, en particular en çò dels joves. A Ginhac, lo jornalista Clamenç Alet interròga en dirècte Anne-Laure Tobena, licenciada a Florensac, a prepaus de sa practica. Seguisson d’imatges de la partida de dobertura de la Copa del monde de jòc del tambornet, qu’opausa lo Brasil a França. Los jogaires brasilièrs Victor Afonso e Ronaldo Blanco detalhan las dificultats rencontradas per lor equipa. Jean Gascon, espectator e ancian jogaire, exprimís sa jòia d'assistir a aquela partida. Yohan Pierron, jogaire francés, comenta la victòria de son equipa. Retorn en platèu ont Anne-Laure Tobena compara las equipas de França e d'Itàlia. Puèi evòca la portada importanta de la creacion d'una Copa del monde.

  • 15 set. 2012

    Ref. 00038

    Lenga : OC

    Lo Jornalet.com

    Lo Jornalet.com es un site web d'informacion generalista editat a la Val d’Aran, e lo primièr jornal en occitan unicament numeric. Sos jornalistas son venguts a Rodés per cobrir lo festenal occitan L'Estivada. Ferriol Macip, son fondator, evòca las chifras de frequentacion del site, que respond a l'espèra del public per son costat participatiu e sa linha editoriala, e sa professionalizacion futura.

  • 17 set. 2011

    Ref. 00028

    Lenga : OC

    Occitanica : mediatèca numerica

    Occitanica es una bibliotèca numerica desvolopada pel CIRDÒC que recensa la literatura e la creacion en lenga d'òc, precisa son administratritz, Clotilde Notarangelo. Gilles Bancarel, encargat dels fonses patrimonials, evòca los partenariats interregionals que son estats meses en plaça per tal de rendre possibla aquesta valorizacion. Benjamin Assié, conservator del CIRDÒC, met en abans l'importància d’Internet pel desvolopament de la cultura occitana.

  • 17 oct. 2010

    Ref. 00089

    Lenga : OC

    Lo Còr de la Plana

    Marcha es la novèla creacion del grop polifonic marselhés Lo Còr de la Plana. Davant la glèisa Sant Pèire de las Cosinas a Tolosa, lo grop canta lo títol Tant deman, eissit de lor album eponime. Sus d’imatges del grop en repeticion, Manu Théron, lo creator del grop, evòca las cançons contestatàrias que compausan l'album. D’unas son de represas de cants del sègle XIX. Descriu puèi lo caractèr anticonformista de la vila de Marselha. Per acabar, lo grop entòna la cançon La Libertat.

  • 11 abr. 2010

    Ref. 00060

    Lenga : OC

    L'occitan a la Val d'Aran e en Catalonha

    La Generalitat de Catalonha a decidit d'autrejar una granda autonomia al territòri de la Val d'Aran. Aquò passa en particular per un sosten financièr al desvolopament de l'occitan sul territòri. Un representant del govèrnament aranés presenta l'Ofici de l'occitan en Catalonha, de sa creacion a la mesa en plaça d'aisinas numericas e lingüisticas. Puèi, Jusèp Loís Sans Socasau, director del programa Occitan en Catalonha, evòca l'utilizacion de la lenga dins l'administracion e dins l'ensenhament. En efièch, la Generalitat de Catalonha finança de corses en occitan. Atal al Comitat d’afrairament occitan-catalan (CAOC), de corses per adultes son dispensats. Thiago Mori, estudiant en filologia, ne fa partida. Nicolau Rei-Bèthvéder, professor vengut de França, descriu l'ensenhament de l'Istòria d'Occitània dins las escòlas catalanas. Estima qu’aquò aurà de consequéncias positivas sus l’interès per la lenga occitana.