Mediatèca

Lo grop femenin Cocanha es compausat de Caroline Dufau, de Lila Fraysse e, darrièra arribada, de Maud Herrera que n'es la primièra aparicion televisuala. Aprèp una presentacion de lor virada estivala, las cantairas interprètan lo tròç Dempuèi Auriac dins lo jardin Raimon VI de Tolosa, a la broa de Garona.

Seleccionats per Les Inouïs, la scèna descobèrta del festenal Le Printemps de Bourges, los musicians auvernhats de Super Parquet an conquistat un public de professionals e d'amators. Propausan un repertòri que mescla electrò e musicas tradicionalas. Julien Barathay, a las maquinas e bordons electrics, e Louis Jacques, al cant e a la cabreta electrica, dònan un retorn positiu d’aquesta experiéncia

Marcha es la novèla creacion del grop polifonic marselhés Lo Còr de la Plana. Davant la glèisa Sant Pèire de las Cosinas a Tolosa, lo grop canta lo títol Tant deman, eissit de lor album eponime. Sus d’imatges del grop en repeticion, Manu Théron, lo creator del grop, evòca las cançons contestatàrias que compausan l'album. D’unas son de represas de cants del sègle XIX. Descriu puèi lo caractèr anticonformista de la vila de Marselha. Per acabar, lo grop entòna la cançon La Libertat.

D’afogats del grop Nadau van al concèrt del grop a l'Olympia, venent de Pau e de Dunas dins Tarn e Garona. L'ambient es a la fèsta, a las colors d'Occitània. Lo jove Baptiste e una passatgièra contan lor viatge. En francés e en occitan, d’espectators soslinhan la portada d’aquel concèrt, e l’aspèct federator e intergeneracional de Naudau.

Convidats de l'emission Le cercle de Minuit, Bernard Lubat, André Minvielle e Patrick Auzier, totes membres de la Companhiá Lubat son filmats dins una performància vocala e ritmica intitulada Passa a taula.

Lo grop Nux Vomica interprèta la cançon Catarina pendent lo festenal Histoire d'Occitanie a Castèlnou de Les.

Los membres del grop Massilia Sound System presentan los luòcs claus de lor vila, Marselha. La passejada comença amb Tatou e Janvié dins lor estúdio d'enregistrament. Se retròba Jali a la Forme 9 del pòrt de Marselha. Lo cantaire evòca la desindustrializacion de la vila e l'apauriment cultural que ne resulta. Puèi, Gari presenta la Corderie, ont lo grop donèt sos primièrs concèrts. Suls teulats del luòc, descriu l’arquitectura tipica de la ciutat foceana. Puèi, rejonch per Jali, Lux B e Blu, va al quartièr de Belsunce. Jali conta l’istòria de l’anciana sala d’espectacle L’Alcazar. Menciona las operetas dels ans 1930, qu’an jogat un grand ròtle dins la creacion de l’estereotipe marselhés. Lo grop interprèta apuèi lo títol La Comèdia Provençala dins un ermàs.

A travèrs d'un passacarrièra pel quartièr Naut Bernat a Tolosa, los Fabulous Trobadors nos fan descobrir la vida de l'endrech e la musica occitana. Animan tanben los mercats de vilatge. Los cantaires, Claude Sicre e Enjalbert (Ange B), entònan una improvizacion trilingüa, en occitan, francés e portugués amb lo cantaire brasilièr Eraldo Gomes. Aqueste d’aquí evòca, en portugués, l'art de l'improvizacion e son importància dins l'enriquiment de las lengas. Puèi lo jornalista Jacme Gaudas menciona lo caractèr universal de la cançon occitana, que l'inspiracion n’es, pr’aquò, posada dins la vida locala. Puèi, lo duò va dins un mercat de vilatge, e i interprèta la cançon Cachou Lajaunie jos l’agach curiós dels badaires.

Sus scèna, en repeticion, Rosina e Martina de Pèira evòcan lor musica e assòcian borrèia e sintetizador. Dins l’ostal de Rosina de Pèira, aquesta conta lo contèxte de creacion de lor primièr disc, qu'an volgut ancorat en Occitània. Aquò las a menadas a crear l’ostal de disques Revolum. Michel Berthoumieux, son director, ne descriu lo foncionament. Puèi Rosina e Martina de Pèira, al cant, Michel Gouben, al sintetizador, e Dominique Regef, a la contrabassa puèi a la vièla de ròda, interprètan doas cançons eissidas del disc Lé, dont Las filhas del Saulà.

Lo cantaire Claudi Martí es entrevistat a Confolenç dins Aude, ont exerça son mestièr d'institutor. Evòca son refús de la violéncia economica qu’obliga a l'exòdi rural, tampa las usinas, contamina las mars. Interprèta puèi sus una scèna de vilatge la cançon Montsegur, acompanhat a la guitarra per Gilles Cardon e a la contrabassa per Didier Capeille.

Per las carrièras de Besièrs, Maria Roanet evòca sa vila natala, e la lenga occitana, lenga dels vençuts, de paures e d’alienats. Illustra sos prepauses en contant, en occitan, un sovenir d'escòla. Puèi, al mitan de batariás de polalhas, interprèta la cançon Los Uòus. Sus las nautors de Besièrs, l'artista precisa son engatjament per la lenga e la cultura occitanas, e los objectius que se fixa per l’avenidor.

A l'ocasion de l'emission Sport Été consacrada al campionat del monde de ciclisme sus rota en Espanha, Joan Pau Verdièr es entrevistat a prepaus de son identitat revendicada de cantaire occitan. Definís Occitània coma una unitat lingüistica e culturala. Conta una anecdòta raportada per l’escrivan Gaston Bonheur a prepaus de las frontièras lingüisticas. Convida los telespectators a sortir dels clichés suls meridionals, e rapèla que mai de la meitat dels abitants d'Occitània ne parla la lenga. Interprèta puèi Chanti per tu.

Lo reportatge presenta la creacion del Conservatòri occitan a Tolosa. S’i veson los diferents ensenhaments prepausats. Pierre Corbefin presenta las missions a venir, e descriu las rasons de sa creacion. Per Françoise Dague, s'agís en particular de se reapropriar la cultura occitana. Hubert Perada menciona l'entosiasme del public per aqueste projècte.

De joves de Laruntz de la val d’Aussau, s’amassan dins los cafès o dins un luòc que rebategèron « le casino de la placette » (lo casino de la placeta) per cantar lo repertòri tradicional de la valada. Un dels participants, Jacques Cauhapé, explica l’origina del nom del luòc. Explica la tòca de las reünions : cantar en tota convivialitat, collectar lo vast repertòri alprèp dels ancians, se’n apropriar e n’assegurar la transmission. Entonan un cant occitan al caractèr pastoral : Pastorejant lo long d'acera aigueta.